在劇集《大時代》中飾演童年版方展博的黃寶龍，當年演出時雖然只有十二歲，加上之前全冇演出經驗，但跟飾演其父親方進新的劉松仁，那份父子濃情卻演得絲絲入扣。尤其童年方展博目撃父親被丁蟹活活打死、但未能相救一幕，不單成為方展博一生遺憾，更是黃寶龍演藝路上最經典一幕。而黃寶龍另一部為人熟悉的作品，則是1996年和好友唐寧由「兄妹」變成「小情人」，合演電影《四個32A和一個香蕉少年》，並把熒幕初吻獻給唐寧。

自爆成日激親松哥

而自從《四》片後，黃寶龍幾乎絕迹幕前，現在主力打理家族經營的書局生意。黃寶龍接受《東網》訪問，直言《大》劇重播令他感到十分開心：「我有份參與呢套咁經典嘅劇集，真係好榮幸好開心。記得當年拍得好順利，我哋四個小朋友都拍得好開心。劉松仁真係對我哋好好，成日都會教我哋走位，佢會執得好嚴，不過有時我哋掛住玩，都會激親佢架，哈哈！」

爆唐寧隨時喊得出

談到拍攝親眼目睹劉松仁被鄭少秋活活打死一幕，黃寶龍直言埋位前，做了不少準備功夫：「劉松仁同導演有親自解釋畀我聽，教我點做，應該邊個位將情緒爆發出嚟，所以拍出嚟效果好好。其實我算係最難入戲嗰個，我最佩服係唐寧，隨時都可以喊得出。」

黃寶龍的爺爺在香港開設「精神書局」，黃寶龍負起第三代傳人的責任努力經營書局，近年更以書局負責人身份，接受鄭裕玲電台訪問，或參與公開活動。他說：「呢間書局喺阿爺嗰代已經開始搞，依家傳到落我呢代，令我更加有使命感，將阿爺嘅心血同生意傳承落去，發揚光大。依家經營方面最大嘅困難，就係租金壓力，所以我都會用好多方法，例如為書局開Facebook、instagram或接受訪問，加多啲新元素，令更多人認識我哋。」

謙稱冇market

至於會否再重返幕前，黃寶龍笑言：「如果《大時代》真係開拍電影版搵我拍，我都想拍，不過我真係好耐冇拍戲！（拍電視劇？）哈！唔好嘞啩！我都冇market！」