［文匯報］《利瑪竇》舞台劇叫好叫座

香港文匯報訊 劉松仁籌備兩年多的心血音樂舞台劇《利瑪竇》，前晚在文化中心舉行首場，全院滿座，到場的嘉賓有鄧萃雯、衛蘭、衛詩、姜大衛夫婦、朱潔儀等等。男主角王梓軒(Jonathan)同女主角陳潔儀(Kit)，於頭場表現得淋漓盡致，歌聲嘹亮，現場不少觀眾都被他們感動致眼濕濕，衛蘭也是其中一個，衛蘭說：「好感動，成個故事都好鼓勵，利瑪竇一份堅持同勇氣令我覺得好有希望，成個製作都好好，Jonathan跑去搶返個十字架時，我好感動，有滴眼淚。」而衛詩大讚啲歌好聽，最尾那part亦感動到眼濕濕。

朱潔儀亦異口同聲說：「他們好投入去做，好感動，我臨尾喊咗出來，歌好正，開場已經覺得好澎湃，梓軒做利瑪竇做得好出色，Kit的歌好好聽。」

雯女大讚眾演員都好認真，故事亦好感動，她說：「劇本幾深，唔係一睇就即刻明，係需要時間消化，我晚上返去要再深深嗒吓嗰陣味道……睇完對利瑪竇認識多咗，將西方文化、天主帶到去中國係好困難，原來係花咗咁多咁多嘅年月同心力，同埋要不屈不撓，對我自己都好大提醒。」

完場時，眾演員到台上謝幕後，全院觀眾都不肯離場，企起身一直拍掌歡呼，5分鐘後，各演員再次出場，而大功臣松哥亦上台一同鞠躬致謝，頭場演出十分成功，餘下十一場的表演，他們台前幕後會團結一心，做到最好！