［文匯報］跟劉松仁王梓軒拍劇結緣 鍾嘉欣閃現支持《利瑪竇》

香港文匯報訊 由王梓軒、陳潔儀主演，劉松仁一手策劃兼導演及創作的音樂劇《利瑪竇》，自公演以來叫好叫座，反應非常好！繼特首林鄭月娥、徐小鳳、汪明荃、薛家燕、鍾楚紅前來捧場後，接下來多場的音樂劇亦有不少圈中人來支持，包括陳寶珠、麥嘉、鍾嘉欣、黃浩然、曹永廉、阿Bob（林盛斌）、梁競徽、王君馨及王梓軒師傅趙增熹等。

鍾嘉欣與松哥及梓軒因合拍劇集《華麗轉身》而熟絡，她知道松哥為《利瑪竇》花了很多心機、時間，所以趁在港便特意來到尖沙咀文化中心為松哥及梓軒打氣，之後便趕回家湊小朋友。

跟梓軒分屬好友的黃浩然、曹永廉、阿Bob和梁競徽，日前相約捧場，浩然說：「啱啱睇完《利瑪竇》舞台劇，阿廉係冇呢個藝術氣質，我就專登買飛請阿廉睇。咁當然係好感動，我對呢個團隊好佩服，松哥花咗好多時間，我諗除咗利瑪竇呢個人係偉大嘅大愛，同大家分享愛，我覺得好值得我哋去尊敬，亦都希望大家將呢個訊息傳開去。」

阿廉說：「今次個舞台劇對我有好多啟發，大家都係帶出一個愛，好感人，成班演員真係佩服到不得了，梓軒真係不得了！」

Bob讚台前幕後一百分

跟梓軒合作《兄弟幫》的好兄弟阿Bob說：「我今（當）日嚟支持王梓軒，我覺得佢嘅非常表現係非常非常之好，成個劇嘅製作，台前幕後嘅製作真係一百分。（睇完之後有咩領悟？）四個字，殊途同歸，唔同嘅宗教或唔同嘅派別，係因為世俗人要將佢唔同嘅群族、唔同嘅國家，要將佢分開，原來講嘅係一模一樣，呢個理論對我嘅感受好深，特別係最尾嗰一幕，我見到全場人揮動嗰個小小嘅種籽，成個畫面都好美麗，仲有使者嘅何洋，把聲好正！」

梁競徽說：「好感動，特別好想講劉兆康好犀利，我已經愛上呢個演員，唱得好好、演得好好，好打動到我。」

［騰訊大粵網香港］群星撐場 《利瑪竇》添食 王梓軒：我可以做得更好

【大粵網 香港】一連十二場嘅音樂舞台劇《利瑪竇》日前圓滿完成，單單喺最後兩場，已有唔少圈中人專誠前來欣賞，如馮寶寶、楊千嬅、李佳芯、洪永城、梁嘉琪、米雪、鄭丹瑞夫婦、陳家樂、黃子恒、林景程、歐錦棠夫婦、江美儀、朱慧敏同King@C All Star等，其中馮寶寶更加係專誠坐飛機趕返香港，事後佢大讚套劇好好睇又感動。

飾演「利瑪竇」嘅王梓軒、「樸人麥小妹」嘅陳潔儀同其他演員精湛嘅演出，以及嘹亮嘅歌聲，喺多場演出都贏盡觀眾口碑同掌聲。而喺慶功宴時，身為此劇策劃、導演同創作嘅劉松仁更當眾宣佈添食，佢話：「呢次我哋合作好愉快！首先多謝各位先，我哋已經接到邀請出年回歸！」消息令全劇上下人員都為之振奮。

王梓軒為此說：「如果松哥覺得我呢個小朋友可以捱多12場或巡迴，我梗係話得啦！其實今次《利瑪竇》係一個旅程，今日尾場或者呢12場嘅成績係未可以講，因為我感受到呢件事會延續落去，可能唔同嘅形式，或者延續喺我自己嘅生命，因為呢12場我感受最深係我未搵完，利瑪竇呢個角色我有好多嘢都未搵到，我依家係第一個階段，感受到知道佢嘅訊息，知道呢個戲嘅意思喺邊，但我相信如果俾多次機會我，我可以做得更加好，所以尾場嘅感受係，既然大家咁鼓勵喇，我哋就繼續努力啦！」

事實上，王梓軒為咗演活「利瑪竇」，過去四個月都幾乎閉關自己，不斷去排練，佢話：「因為對白有文言文、義大利文、拉丁文，我唔止要知佢意思，我要知點解要喺呢個位出現，明白咗就去背，我練咗一千次……所以公演時，每一日都係去探索，用心同努力係基本，亦都要有緣份，松哥、阿達、潔儀，所有人嘅緣份，真系千載難逢，我會好好珍惜！」